បច្ចេកទេសគណនាឌីសង់ទ័រមេ កុងតាក់ទ័រ រីឡេការពារលើសបន្ទុក និងដំឡើងម៉ូទ័រ Fire Pump 125HP (93kW) ឱ្យត្រឹមត្រូវតាមស្តង់ដារ IEC

បច្ចេកទេសគណនាឌីសង់ទ័រមេ កុងតាក់ទ័រ រីឡេការពារលើសបន្ទុក និងដំឡើងម៉ូទ័រ Fire Pump 125HP (93kW) ឱ្យត្រឹមត្រូវតាមស្តង់ដារ IEC

ការពិពណ៌នា

សារៈសំខាន់នៃម៉ូទ័រពន្លត់អគ្គិភ័យ និងការគណនាឱ្យបានត្រឹមត្រូវ នៅក្នុងរចនាសម្ព័ន្ធអគារទំនើបៗ មិនថាជាអគារស្នាក់នៅ ខុនដូ ឬរោងចក្រឧស្សាហកម្មនោះទេ "ប្រព័ន្ធបូមទឹកពន្លត់អគ្គិភ័យ" (Fire Pump System) គឺជាខែ្សការពារចុងក្រោយដែលមិនអាចខ្វះបាន។ ក្នុងនោះដែរ ម៉ូទ័រអគ្គិសនីគឺជា "បេះដូង" ដែលផ្តល់កម្លាំងជំរុញដល់ប៉ូម ដើម្បីបញ្ជូនទឹកទៅកាន់គ្រប់ជាន់នៃអគារក្នុងករណីមានអាសន្ន។

ម៉ូទ័រទំហំ 125HP ឬ 93kW គឺជាម៉ូទ័រប្រភេទកម្លាំងធំ (Heavy Duty) ដែលប្រើប្រាស់ថាមពលអគ្គិសនីខ្ពស់។ ការដំឡើងម៉ូទ័រប្រភេទនេះ មិនមែនគ្រាន់តែជាការតភ្ជាប់ខ្សែភ្លើងឱ្យវិលនោះទេ ប៉ុន្តែវាគឺជាការអនុវត្តតាមបទដ្ឋានវិស្វកម្មដ៏តឹងរឹងបំផុត។ ហេតុអ្វីបានជាយើងត្រូវគណនាឱ្យបានច្បាស់លាស់?

• សុវត្ថិភាពជាចម្បង៖ ការជ្រើសរើសទំហំខ្សែ ឬឌីសុងទ័រតូចជាងតម្រូវការ នឹងបង្កជាកម្តៅខ្លាំងដែលនាំឱ្យមានគ្រោះថ្នាក់អគ្គិភ័យដោយខ្លួនឯង។
• ភាពជឿជាក់នៃប្រព័ន្ធ៖ ក្នុងស្ថានភាពអាសន្ន ម៉ូទ័រត្រូវតែដំណើរការភ្លាមៗដោយគ្មានការរអាក់រអួល។ ការកំណត់តម្លៃឧបករណ៍ការពារ (Setting) មិនត្រឹមត្រូវ អាចធ្វើឱ្យម៉ូទ័រលើសបន្ទុក (Trip) នៅពេលដែលយើងត្រូវការវាបំផុត។
• សេដ្ឋកិច្ច និងអាយុកាលឧបករណ៍៖ ការគណនាត្រឹមត្រូវជួយកាត់បន្ថយការខាតបង់ថាមពល (Power Loss) និងជួយឱ្យម៉ូទ័រមានអាយុកាលប្រើប្រាស់បានយូរអង្វែង។

នៅក្នុងអត្ថបទនេះ ខ្ញុំនឹងនាំបងប្អូនទាំងអស់គ្នាទៅសិក្សាអំពីរបៀបគណនានិងជ្រើសរើសឧបករណ៍អគ្គិសនីមេៗ ចាប់តាំងពីឌីសុងទ័រ ខ្សែភ្លើង រហូតដល់គ្រឿងបង្គុំនៅក្នុងទូបញ្ជាផ្កាយ-ត្រីកោណ (Star-Delta Starter) សម្រាប់ម៉ូទ័រ 125HP នេះ ដោយផ្អែកលើរូបមន្តវិស្វកម្ម និងបទដ្ឋានបច្ចេកទេសពិតប្រាកដ។

ការវិភាគបច្ចេកទេស និងការគណនាវិស្វកម្ម

ការវិភាគបច្ចេកទេស



រូបភាពស្លាកសញ្ញា (Nameplate) Fire Pump

ផ្អែកលើរូបភាពស្លាកសញ្ញា (Nameplate) និងរូបរាងរបស់ម៉ូទ័រ Fire Pump នេះគឺជាការពន្យល់លម្អិតអំពីចារឹកលក្ខណៈបច្ចេកទេសរបស់វា៖

1. ព័ត៌មានទូទៅ (General Information)
   • ម៉ាក (Brand)៖ TECHTOP MOTOR
   • ប្រភេទម៉ូទ័រ៖ Fire Pump Motor (ម៉ូទ័រសម្រាប់បូមទឹកពន្លត់អគ្គិភ័យ)
   • ម៉ូដែល (Model)៖ F-TDC 404TS125U2B
   • ស្តង់ដារ៖ មានសញ្ញា UL Listed និង CE ដែលបញ្ជាក់ថាវាអនុលោមតាមស្តង់ដារសុវត្ថិភាពខ្ពស់សម្រាប់ប្រព័ន្ធបង្ការអគ្គិភ័យ។
2. លក្ខណៈអគ្គិភ័យ (Electrical Specifications)
   • កម្លាំង (Power)៖ 125HP ឬ 93kW (ជាម៉ូទ័រដែលមានកម្លាំងខ្លាំង)។
   • តង់ស្យុង (Voltage)៖ 380V (ប្រើភ្លើង ៣ ហ្វា)។
   • ហ្វ្រេកង់ (Frequency)៖ 50Hz។
   • ចរន្តអគ្គិភ័យ (Current)៖ 176A (ចរន្តពេញបន្ទុក)។
   • ល្បឿនរង្វិល (Speed)៖ 2943RPM (ជាប្រភេទម៉ូទ័រល្បឿនលឿន ឬ ២ ប៉ូល)។
   • កម្រិតប្រសិទ្ធភាព (Efficiency)៖ 93%។
   • កត្តាអានុភាព ឬមេគុណកម្លាំង (Power Factor)៖ Cosφ = 0.87។
3. ការរៀបចំខ្សែ និងការបញ្ឆេះ (Connections & Starting)
   • ការតភ្ជាប់ (Connection)៖ ម៉ូទ័រនេះប្រើការបញ្ឆេះបែប Start - Delta (ផ្កាយ-ត្រីកោណ) ដើម្បីកាត់បន្ថយចរន្តពេលបញ្ឆេះដំបូង។
   • ដ្យាក្រាមខ្សែ៖ មានបង្ហាញនៅលើស្លាកស្រាប់ (T1 ដល់ T6) សម្រាប់ការតភ្ជាប់ក្នុងប្រអប់ Terminal។
4. លក្ខណៈមេកានិច និងបរិស្ថាន (Mechanical & Environmental)
   • ទម្រង់ (Frame)៖ 404TS
   • កម្រិតការពារ (Protection)៖ IP 23 (ការពារទឹកសាច និងវត្ថុរឹងដែលមានទំហំធំជាង 12mm ចូល។ ជាទូទៅ IP នេះប្រើសម្រាប់ម៉ូទ័រដែលតម្លើងក្នុងអគារ)។
   • ប្រភេទរុំ (Insulation Class)៖ Class F (អាចធន់នឹងកម្តៅបានខ្ពស់)។
   • ទម្ងន់ (Weight)៖ 422kg។
   • សីតុណ្ហភាពមជ្ឈដ្ឋាន (Ambient Temp)៖ អាចដំណើរការបានរហូតដល់ 50°C។
5. ការសង្កេតលើការដំឡើង (Installation Observation)
   • ម៉ូទ័រនេះត្រូវបានភ្ជាប់ជាមួយក្បាលស្នប់ (Pump) ដោយប្រើ Coupling និងមានរបាំងការពារពណ៌លឿង (Safety Guard)។
   • នៅលើរបាំងពណ៌លឿងមានការរំលឹកឱ្យពិនិត្យមើល Alignment (តម្រឹមឱ្យត្រង់ជួរ) ឱ្យបានច្បាស់លាស់មុនពេលដំណើរការ ដើម្បីការពារការញ័រខ្លាំង (Vibration) និងខូចដុំជ័រ Coupling ឬ Bearing។
Related Posts

ការគណនាវិស្វកម្ម

សម្រាប់ការគណនាផ្នែកវិស្វកម្មអគ្គិភ័យលើម៉ូទ័រទំហំ 125HP ឬ 93kW នេះ យើងត្រូវអនុវត្តតាមរូបមន្តស្តង់ដារដើម្បីធានាបាននូវសុវត្ថិភាព និងប្រសិទ្ធភាពខ្ពស់។ ខាងក្រោមនេះគឺជាការគណនាលម្អិតតាមជំហានបច្ចេកទេស៖

ការគណនាចរន្តពេញបន្ទុក (Full Load Current - I_FLC)

ជំហានដំបូងបំផុតគឺការផ្ទៀងផ្ទាត់ចរន្តដែលម៉ូទ័រប្រើប្រាស់ពិតប្រាកដ។ ផ្អែកតាមរូបមន្តវិស្វកម្មអគ្គិសនី៖

រូបមន្តគណនាម៉ូទ័រចរន្តពេញបន្ទុក

$$I = \frac{P}{\sqrt{3} \times V \times \cosφ \times \eta}$$

ដោយ៖
- \(P\) = 93,000W
- \(U\) = 380V
- \(Cosφ\) = 0.87
- \(η\) = 0.93


ជំនួសលេខចូល
$$I = \frac{93,000 \text{ W}}{1.732 \times 380 \times 0.87 \times 0.93} \approx 174.6\text{ A}$$

លទ្ធផលយើងទទួលបានពីការគណនាចរន្តពេញបន្ទុកគឺមានតម្លែ 175A។ តម្លៃនេះគឺជាមូលដ្ឋានគ្រឹះសម្រាប់ជ្រើសរើសឧបករណ៍ការពារផ្សេងៗទៀត (តម្លៃនេះស៊ីគ្នាជាមួយស្លាកសញ្ញាម៉ូទ័រ)។

ការជ្រើសរើសឧបករណ៍ការពារ និងឧបករណ៍បញ្ជាតាមរូបមន្តច្បាស់លាស់

ការគណនាជ្រើសរើសទំហំឌីសុងទ័រ (Circuit Breaker)



រូបភាពឌីសង់ទ័រមេ 400 A ចំនួន 2 គ្រាប់

ម៉ូទ័រដែលយើងកំពុងលើកយកមកសិក្សាគឺជាប្រភេទម៉ូទ័រដែលមានកម្លាំងខ្លាំង និងមានសារៈសំខាន់បំផុតក្នុងប្រព័ន្ធសុវត្ថិភាពអគារ។ ការជ្រើសរើសឧបករណ៍បញ្ជា និងការពារត្រូវធ្វើឡើងឱ្យបានត្រឹមត្រូវបំផុត។ តាមស្តង់ដារ NEC សម្រាប់ម៉ូទ័រពន្លត់អគ្គិភ័យ ឌីសុងទ័រត្រូវមានសមត្ថភាពទ្រាំទ្រចរន្តបញ្ឆេះបានល្អ។ តាមស្តង់ដារជាទូទៅសម្រាប់ម៉ូទ័រ (Inductive Load) ឌីសុងទ័រត្រូវជ្រើសរើសចន្លោះពី 150% ឬ 1.5 ដង ទៅ 250% ឬ 2.5 ដងនៃ នៃ I_FLC ដើម្បីការពារការលើសបន្ទុក (Trip) នៅពេល Start ដែលមានចរន្តហក់ខ្ពស់ (Inrush Current)។ ផ្អែកតាមចរន្តពេញបន្ទុកលើស្លាកសញ្ញា I_FLC = 176A នៅតង់ស្យុង 380V៖

រូបមន្តគណនាឌីសង់ទ័រ

$$I_{CB} = I_{FLC} \times 250\%$$

ដោយ៖
- \(I\)_FLC = \(176 A\)

ជំនួសលេខចូល
$$I_{CB} = 176\text{ A} \times 2.5 = 440\text{ A}$$

ការជ្រើសរើសតាមការដ្ឋាន: ផ្អែកតាមការគណនានេះ ការជ្រើសរើសប្រើប្រាស់ MCCB ទំហំ 400 A គឺជាជម្រើសដ៏ស័ក្តិសម និងពេញនិយមបំផុត (ជ្រើសរើសប្រភេទ Adjust Trip គឺកាន់តែប្រសើរ)។ ការអនុវត្តជាក់ស្តែងសម្រាប់ការងារ Fire Pump វិស្វករតែងតែជ្រើសរើសយកមេគុណខ្ពស់រហូតដល់ 250% ដើម្បីធានានូវភាពជឿជាក់ខ្ពស់បំផុតនៃប្រព័ន្ធសុវត្ថិភាព។

ការគណនាទំហំមុខកាត់ខ្សែភ្លើងមេ (Main Cable Size)

បន្ទាប់ពីយើងបានដឹងពីទំហំឌីសុងទ័រការពាររួចមក ការជ្រើសរើសខ្សែភ្លើងគឺជាជំហានដ៏សំខាន់បំផុតទី២។ សម្រាប់ម៉ូទ័រពន្លត់អគ្គិភ័យ យើងមិនអាចជ្រើសរើសទំហំខ្សែតាមការស្មានបានឡើយ ប៉ុន្តែត្រូវប្រើប្រាស់រូបមន្តដង់ស៊ីតេចរន្ត រួមផ្សំជាមួយបទដ្ឋានបច្ចេកទេស។

ដើម្បីឈានទៅស្វែងរកទំហំមុខកាត់ខ្សែមេ យើងអាចប្រើប្រាស់រូបមន្តគ្រឹះ S = I/J គឺជាវិធីសាស្ត្រមូលដ្ឋាន និងរហ័សបំផុតមួយក្នុងការគណនារកទំហំមុខកាត់ខ្សែភ្លើង \(S\) ដោយផ្អែកលើចរន្ត \(I\) និងដង់ស៊ីតេចរន្ត \(J\)។

ដើម្បីកុំឱ្យខ្សែភ្លើងឡើងកម្តៅខ្លាំង និងធន់នឹងចរន្តបញ្ឆេះ ខ្សែភ្លើងត្រូវមានសមត្ថភាពចម្លងចរន្តលើសពីចរន្តម៉ូទ័រពេញបន្ទុក (Full Load Current) 125%។

រូបមន្តគណនាទំហំមុខកាត់ខ្សែ

$$S = \frac{I_{FLC} \times 1.25}{J}$$

ដោយ៖
- \(I\)_FLC = 176 A
- \(J\) = 2A/mm²


ជំនួសលេខចូល
$$S = \frac{176\text{ A} \times 1.25}{2 \text{ A/mm}^2}$$$$S = \frac{220\text{ A}}{2 \text{ A/mm}^2} = \mathbf{110 \text{ mm}^2}$$

ផ្អែកតាមលទ្ធផល 110 mm² នេះពុំមានលក់នៅលើទីផ្សារ យើងត្រូវជ្រើសរើសទំហំខ្សែស្តង់ដារដែលមានលក់នៅលើទីផ្សារគឺ 120 mm² ខ្សែត្រូវជ្រើសរើសយកប្រភេទ NYY ឬ CV (ប្រសិនបើមានចំងាយឆ្ងាយយើងត្រូវដំឡើងទំហំមុខកាត់ខ្សែអោយធំជាង 120 mm² ដើម្បីការពារការធ្លាក់តង់ស្យុង (Voltage Drop)។

យោងតាមតារាងបទដ្ឋានខ្សែ IEC 60364 (ដំឡើងក្នុងបំពង់ ឬលើ Cabel Tray) ខ្សែទំហំ 120 mm² អាចទ្រាំទ្របានប្រហែល 250 A - 270 A។

ការគណនាគ្រឿងបង្គុំ Star/Delta (Contactor & Overload)



កុងតាក់ទ័រសម្រាប់ត្រីកោណ

ដោយសារម៉ូទ័រនេះដំណើរការបញ្ឆេះតាមរបៀប Star/Delta ចរន្តដែលឆ្លងកាត់ឧបករណ៍នីមួយៗមានតម្លៃខុសគ្នា។ កុងតាក់ទ័រ Main & Delta ត្រូវមានទំហំយ៉ាងតិច 58% នៃចរន្តម៉ូទ័រពេញបន្ទុក I_FLC។ កុងតាក់ទ័រ Star ត្រូវមានទំហំយ៉ាងតិច 33% នៃចរន្តពេញបន្ទុក I_FLC។

• ការជ្រើសរើសទំហំកុងតាក់ទ័រមេ និង ត្រីកោណ - Contactor Main/Delta (I_KM / I_KD)
រូបមន្តគណនាចរន្តកុងតាក់ទ័រមេនិងត្រីកោណ

$$I_{Phase(Main/Delta)} = \frac{I_{FLC}}{\sqrt{3}} = I_{FLC} \times 0.58$$
ជំនួសលេខចូល
$$I_{Phase(Main/Delta)} = 176\text{ A} \times 0.58 = 102.08\text{ A}$$

ជ្រើសរើស: កុងតាក់ទ័រប្រភេទ AC-3 ដែលមានតម្លៃចរន្ត $115\text{ A}$ ឡើងទៅ។



កុងតាក់ទ័រសម្រាប់ផ្កាយ

• ការជ្រើសរើសកុងតាក់ទ័រផ្កាយ - Star Contactor (I_KS)
រូបមន្តគណនាចរន្តកុងតាក់ទ័រផ្កាយ

$$I_{Phase(Star)} = I_{FLC} \times 0.33$$

ដោយ៖
- \(I\)_FLC = 176 A

ជំនួសលេខចូល
$$I_{Phase(Star)} = 176\text{ A} \times 0.33$$ $$I_{Phase(Star)}= 58.08\text{ A}$$

ជ្រើសរើស: កុងតាក់ទ័រប្រភេទ AC-3 ដែលមានតម្លៃចរន្ត 65 A ឡើងទៅ។

• ការជ្រើសរើសទំហំរីឡេលើសបន្ទុក - Thermal Overload Relay (I_TOR)

រីឡេការពាកលើសបន្ទុកត្រូវដាក់នៅខាងក្រោមកុងតាក់ទ័រ Main ឬ Delta ដូច្នេះត្រូវ Set តម្លៃតាមចរន្តហ្វា Main ឬ Delta៖

រូបមន្តគណនារីឡេលើសបន្ទុក

$$I_{TOR} = I_{FLC} \times 0.58$$

ដោយ៖
- \(I\)_FLC = 176 A

ជំនួសលេខចូល
$$I_{TOR} = 176\text{ A} \times 0.58 = 102.08\text{ A}$$

ជ្រើសរើស៖ រីឡេការពារការលើសបន្ទុក (Overload Relay) ដែលមានចន្លោះអាចសារ៉េបាន (Adjust) ចាប់ពី 80 A ទៅ 110 A ឬ ពី 90 A ទៅ 150 A។

ការគណនាទំហំកាប៉ាស៊ីទ័រ (Power Factor Correction)

ការដំឡើងកាប៉ាស៊ីទ័រ (Capacitor Bank) គឺដើម្បីកែតម្រូវមេគុណកត្តាអានុភាព cosφ របស់ម៉ូទ័រឱ្យកាន់តែប្រសើរឡើង (ជិតដល់ ១) ដែលជួយកាត់បន្ថយចរន្តអត់ប្រយោជន៍ (Reactive Current) ហូរក្នុងខ្សែភ្លើង។

ដើម្បីបង្កើនកត្តាអានុភាព cosφ ពី 0.87 ទៅ 0.95 យើងត្រូវអនុវត្តតាមរូបមន្ត៖

រូបមន្តទូទៅ៖

$$Q_{kVAR} = P_{kW} \times (\tan\phi_1 - \tan\phi_2)$$

ដោយ៖ - \(P\)_kW = 93 kW
- \(Cosφ\)₁ = 0.87 ==> \(tanφ\)₁ = 0.567
- \(Cosφ\)₂ = 0.95 ==> \(tanφ\)₂ = 0.328


ជំនួសលេខចូល
$$Q_{kVAR} = 93\text{ kW} \times (0.567 - 0.328) = 93 \times 0.239 \approx 22.2\text{ kVAR}$$

ជ្រើសរើស៖ យើងគួរសម្រេចចិត្តប្រើកាប៉ាស៊ីទ័រទំហំ 25 kVAR ដើម្បីផ្ដល់លទ្ធផលល្អបំផុតសម្រាប់ម៉ូទ័រនេះ។

បច្ចេកទេសតម្លើង (Installation Techniques)

• ការរឹតបន្តឹងចំណុចតភ្ជាប់ (Wiring)៖ ត្រូវប្រាកដថាការតខ្សែពីទូបញ្ជាទៅម៉ូទ័រ (ខ្សែ ៦ សរសៃ) ត្រូវតាមដ្យាក្រាមផ្កាយត្រីកោណ (Star-Delta)។ ប្រសិនបើក្បាលកូស (Cable Lug) ឬប៊ូឡុងធូរ វានឹងបង្កើតកម្តៅរហូតដល់រលាយសំបកខ្សែ ឬឆេះប្រអប់ Terminal។
• ការតម្រឹមលីញ (Mechanical Alignment)៖ ត្រូវប្រើឧបករណ៍ Laser ឬ Dial Indicator ដើម្បីឱ្យដងអ័ក្សម៉ូទ័រ និងបូមត្រង់ជួរគ្នាបំផុត។ បើខុសលើសពី 0.05 mm វានឹងញ័រខ្លាំង បណ្តាលឱ្យខូច Bearing និងគ្រាប់ជ័រ Coupling។
• ប្រព័ន្ធដី (Earthing)៖ តភ្ជាប់ខ្សែដី (Grounding) ទៅសំបកម៉ូទ័រឱ្យបានត្រឹមត្រូវ ដើម្បីសុវត្ថិភាពអ្នកបច្ចេកទេស។
• ប្រព័ន្ធខ្យល់៖ ម៉ូទ័រប្រភេទ IP23 (Open Drip Proof) ត្រជាក់ដោយសារខ្យល់បក់ចូលក្នុងរបុំ។ ហាមដំឡើងក្នុងកន្លែងដែលហប់ ឬមានធូលីដីខ្លាំងបិទរន្ធខ្យល់។

ចំណុចគួរប្រយ័ត្ន៖
ដោយសារវាជាម៉ូទ័រពន្លត់អគ្គិភ័យ ការថែទាំត្រូវធ្វើឡើងឱ្យបានទៀងទាត់បំផុត ព្រោះវាត្រូវតែត្រៀមខ្លួនរួចជាស្រេចក្នុងករណីមានអាសន្ន។

បច្ចេកទេសថែទាំ (Maintenance Technique)

1. ការត្រួតពិនិត្យប្រចាំខែ៖
   • វាស់ចរន្តហ្វាទាំង ៣ (L1, L2, L3) ថាមានតុល្យភាពឬទេ និងពិនិត្យសម្លេង Bearing។
   • វាស់តម្លៃ Resistance នៃរបុំខ្សែ (Megger Test) ដើម្បីដឹងពីភាពស៊ាំនៃអ៊ីសូឡង់។
   • ពិនិត្យមើលការឡើងកម្តៅនៅចំណុចតភ្ជាប់ខ្សែភ្លើង។
   • សាកល្បងដំណើរការ (Test Run) យ៉ាងតិច 5-10 នាទី ដើម្បីឱ្យប្រព័ន្ធប្រេងរំអិលដំណើរការ។
2. ការថែទាំប៉ាដាង (Bearings)៖
   • បាញ់ខ្លាញ់គោ (Greasing) តាមកាលកំណត់ដែលកំណត់ដោយរោងចក្រ (មើលស្លាកសញ្ញា Bearing 6314 C3)។ កុំបាញ់ច្រើនពេក ព្រោះអាចធ្វើឱ្យឡើងកម្តៅ។
3. ការសម្អាត៖
   • ដោយសារវាជាប្រភេទ IP 23 (Open Drip Proof) វាមានប្រហោងខ្យល់។ ត្រូវប្រាកដថាគ្មានធូលី ឬវត្ថុផ្សេងៗបិទរន្ធខ្យល់ ដែលនាំឱ្យម៉ូទ័រឡើងកម្តៅខ្លាំង។
ចំណុចពិសេសសម្រាប់ Fire Pump៖

ឌីសុងទ័រសម្រាប់ Fire Pump ក្នុងស្តង់ដារខ្លះត្រូវបានកំណត់ឱ្យ "Lock" ឬមិនឱ្យ "Trip" ភ្លាមៗក្នុងករណីមានអាសន្ន (ព្រោះសុវត្ថិភាពអគារសំខាន់ជាងម៉ូទ័រ)។



រូបភាពបន្ទប់ Fire Pump

លេខរៀង	បរិក្ខារអគ្គិសនី	រូបមន្តគណនា	លទ្ធផលគណនា	ទំហំជ្រើសរើសដំឡើង
១	ឌីសុងទ័រមេ (Main MCCB)	IFLC x 250%	440 A	400 A (Adjustable)
២	ខ្សែកាបមេ (Main Cable)	(IFLC x 125%) / J	110 mm²	120 mm² (NYY/CV)
៣	កុងតាក់ទ័រ (Main & Delta)	IFLC x 0.58	102.08 A	115 A (AC-3 Type)
៤	កុងតាក់ទ័រ (Star)	IFLC x 0.33	58.08 A	65 A (AC-3 Type)
៥	រីឡេលើសបន្ទុក (Overload)	IFLC x 0.58	102.08 A	Set 102 A
៦	កាប៉ាស៊ីទ័រ (Capacitor)	PkW x (tanφ1 - tanφ2)	22.2 kVAR	25 kVAR

* តម្លៃគណនាផ្អែកលើ I_FLC = 176 A តាមស្លាកសញ្ញាម៉ូទ័រជាក់ស្តែង។